السواقة بلبنان

اليوم عبالي إحكي والهيئة رح كتِّر حكي..
يمكن لازم قول سبق السيارات بلبنان.. عأساس كل عمرا السواقة بلبنان سبق.. نحن اللبنانيي هوايتنا السواقة.. مدري شو بيصرلنا مننتقل بس نطلع عالسيارة!
خلّونا نبلّش بالناس اللي بتاخد دفاتر سواقة بلا فحص.. مع إنوبيناتنا يا عيني عهالفحص.. بيشبه كل شي إلا فحص السواقة.. :"رجاع وقرّب وصفّ"... ولك ما عزبوا حالون وسألوني عن شي إشارة من إشارات السير وأنا من قلّة عقلي حفظتون.. ولشو؟ لا استعملتون بالفحص ولا في إشارات عالطريق بالأساس..
ماشي.. رح نعتبر إنو اللبنانيّة كِلون بيعرفوا يسوقوا.. بدون استثناء..
رح ننقل لموضوع السيّارة.. جبنا الدفتر وناقصة السيارة.. بدنا نجيبا بنت عيلة ما بتصرف كتير (عأساس البنزين بلبنان أغلا من الدهب) وقويّة بتوصل معي عالجبل، يعني بدنا سيارة بمواصفات عاليه وسعر حلال..
بتبرم بهالمعارض لبالآخر تنبجّ.. بيطلع إنو اللي فيك تشتريا ما بتنساق.. واللي بتستحليا بيطلع سعرا بسعر سيارة من الشركة.. وبيقلّك العم بيبيعَك طبيعي تكون غالية ما هي أساساً سيارة مصدرا شركة! (ودخلك هودي السيارات المكسرين وين مصدرون نبع القنا؟)..
بعدين هالسيارة شو مشكلتا ليش منباعا ما داما شركة؟ والله صاحبا مسافر وحارقلا سعرا بالأرض.. أو بيقلّك السيارة لمرتو وطالع عبالا تغيّر.. طيب يا خيي بتجيب حدا بيفهم بالسيارات وبتروح تفحصا.. بتطلع السيارة عاملة حادث ما بيفهم..
بعدين يا أخي كتير هلقد.. معقول الفايدة عندك أغلا من فايدة السيارة الجديدة؟ شو بيجاوبَك المعلِّم إيه طبيعي ما سيّارة الشركة شركة.. بينما هون عم تشتري من السوق!! يعني صار بدنا حدا يترجم...
بقى هون بتغيير رأيك وبتقرر تشتري سيارة شركة.. والله بتتوفق بالشركة والشركة بتتوفق فيك.. وبتعلق بموضوع التقسيط.. طبيعي إذا مش نايم عبنك بدّك عرقبتك تقسّط..
يبترتاح من بهدلة الطرقات.. وبتفكّر راسَك ارتاح.. بيطلع يا سيدنا عندك غيار زيت (بالجمع)كل 5000 كم وصيانة إلزامية كل 10000 كم، يعني بحالة متل حالتي.. كل شهرين تقريباً أو أقل شوي بدنا نزور الشركة.. وكان الله يحب المحسنين..
هلّق منخلص من السيارة بدنا نحطا عالطريق لتمشي.. بما إنو سيارتك جديدة والطرقات عنا كتير مرتبة بتصير تعتل هم السيارة عأساس ما فيك تغيّرا كل يوم..
وبتصير تتوقا الجور.. شوفوريّة التاكسي.. والباصات الكبيرة.. والمشاة..والكميونات.. وإلخ..
إنو طريق الجبل حدّث ولا حرج.. بدّك تعتير كل يوم في جورة جديدة.. وكل يوم في نفق عم ينحفر تحت الأض وفوق الأرض.. وبس يخلصوا ما بخبرك مللا فلشت زفت بيفلشوا الطريق.. بتصير ماشي عتلال..
بعدين حدا يخبرني شو مشكلة اللبنانية مع الإشارة.. يا خيي هيدا مش ضو لعيد الميلاد هيدي بتضويا قبل ما تفوت بالمفرق مش بعد ما تفرق.. بعدين قبل ما تفرق عاليمين بتضويا عاليمين مش عالشمال والعكس صحيح..
وبيجيك شي زلمي من إخوانّا الأجانب اللي بيعرفوا يسوقوا.. وبيصير الحادث من حيث لا تدري.. بتقول بسيطة ما أنا مأمن تأمين شامل لجميــــع المخاطر.. فبتعلق علقة جديدة مع شركات التأمين.. بيقلّك نحن منغطي كل شي صحيح.. بس إذ1 في غيار قطع منغيّر قطع قديمة وإلا إذا بدّك قطع جديدة بتدفع 5% من حقون... معقول يا زلمي سيّارة شركة موديل السنة تغيرلا قطع قديمة!!!
والله يا عمي حترنا.. كيف ما عملنا مش مخلصين.. ما بعلمي سيارة الشركة بتريّح..

يعني الله يعين اللي بيعرف يسوق بلبنان.. والله يعين اللي بدو ساعة وساعتين تيوصل عشغلوا.. والله ينجينا من حوادث السير لأن "تعددت الأسباب" بهالبلد العزيز والنتيجة واحدة.