صوت الضفادع

صوت الضفادع بيذكرني بطفولتي،
نحن وصغار كانوا إخوتي (الصبيان) وكل اولاد الجيران يتجمعوا بالصيفية ليلقطوا ضفادع..
أنا كنت كتير "إقرف" من الضفادع، وكنت إزعل كتير لأن انا كنت أصغر شي بيناتون وما يحبوا ياخدوني معون لنلعب.. وكانوا كتير يتسلوا..
كنا نتجمع كلنا بحينا لنلعب "غميضة" (كانوا يلعبوني معون بلا ما يعدوني، عأساس صغيرة)..

وأحلا شي لما كنت أطلع عساحة الكنيسة نهار السبت بعد الظهر لنلعب "فنيش" مع اولاد الضيعة، انا الوحيدة من البنات كانوا يخلوني إلعب معون لأني كنت إقدر صيب الحجار..

شو كانت حلوي ليالينا.. كنا نسهر بالحي قدام البيت ونلعب بدون ما نعرف قديش الساعة.. ويضلوا إماتنا يعيطولنا تنفوت نتحمم وننام.. كانوا يقولولنا بكرا نهار جديد، بكرا بتلعبوا سوا..

كل ما بيبلش الربيع بتذكر هالإيام.. دِعانا شو كانت حلوة!
اللي بيحرك ذكرياتي كلا بهالوقت، هو صوت الضفادع..

يللي منكون عايش بالجبل بيعرف إنو ببرك الميّ ما بيطلعوا الضفادع غير بالربيع يعني بس يدفا الطقس..
نهار السبت كان أول مرة بسمع فيا السنة صوت الضفادع.. وأكيد بصير إسمعو كل ليلة تكانت بلّشت الشتوية.
ما بتتخايلو قديش حلوين هالإيام من السنة الإحساس بيكون غير شي، بتسمعوا أكيد أصوات الضفادع، وصياح الديك بيكون أوضح..

الله يرحم جدي كان يقلي بس "تدغوش الدني" (بس تعتم يعني) بيبلش صوت الضفادع، وبس"يشق الفجر" بيوعى الديك..
لون غروب الشمس والشروق بيكون غير شكل بهالموسم،
بس الأجمل من هيك هني الروايح "ريحة النعنع، الزعتر الأخضر، الحبق، ريحة العشب الأخضر.."

كتير إشيا بتخليني حب الدني، بتذكرني بطفولتي بالناس والجيران، بيلي ماتوا ويللي بعدون عايشين، بيلي بعاد وبيلي كنت إلعب معون وهلق صاروا متل الغربا..
بتذكر كيف كنا نطلع مشي تنلعب عالعين وننسى حالنا فوق وما نتذكر نرجع عالبيت غير عصوت إمي (العين مش بعيدة عن بيتنا)، كان في شجرة كبيرة عطريق العين نلعب بفياتا، نمثل مسرحيات، بعدا لليوم كل ما بشوفا بتذكر شو كنا "شياطين"، وعطريق العين ما كنا نخلي شجر التين يعتب علينا، وكنت دايماً إسأل خيي الكبير ليش شجرة التين مش مزهرة؟

مش معقول كيف تغيرت الإيام من 20 سنة لهلق.. ذكرياتنا تغيرت عن ذكريات الجيل الجديد كانت بيسكلات خيي لكل الحي كلنا نلعب فيا.. وكانوا الصبيان يلعبوا بالنقيفة و"بعربية الرمان"، والبنات يخرطشوا بالطبشور على الحيطان..
أكيد كنا نتعلم بمدارس.. أنا مش عإيام مدرسة السنديانة.. بس كانت ألعابنا بدائية، مشاعرنا كانت بريئة وكل همنا نلعب وناكول ونفجم إجرينا بالركض..

رزقالله عهاك الإيام يا ريتا بترجع..

يا ريت بيرجعوا الناس.. تغيروا كتير بطلوا هني ذاتون، الحزن ملوا عيونون وما بقى في طيبة..

وين الختيارية والبركة اللي كانت ترافقون..

ويناالمطارح القديمة.. صارت كلا ضيقة وما عادت تساع كل الناس

يا ريت بيرجعوا الناس متل ما كانوا ويا ريت بيرجع لبنان متل ما بتذكروا..